Ivanka Benzia – Paška čipka

Ivanka Benzia

PAŠKA ČIPKA

Ponos i dika moga

si grada i naroda,

i ca san starija u tebe sam zajubjenija.

Gedan te cili svoj vik

nagedat te se ne moren.

Onda stanem… gedan…

i penšan.

Ku bi ja volila imat?

Budakovu, brestericu, tamburu,

zmiju, krivu mendulu, papinu,

rotondu, kvadratu ili gvanteru.

Ca ja penšan, ku bi ja volila imat?

Ja bi sve!

Te vridne, šesne, bele ruke

ke su te stvorile,

ke su noga puta pod lumacon celu noć ćorile

da bi te do jutra deštrigale,

prodale i fameju svoju so tin prehranile.

Pogacice, mendulice, ročelice,

pekjice, sunašća, zupcići,

kolumbarići, listacići.

Ki bi se sve to nabroji

matere i nane ca su nan vavik govorile

a vela fala njima

ke su nas šit naucile.

I dok je voje, serca i

jubavu paška čipka i teg

vavik će se lavrat i nikad,

nikad se neće zaboravit.

Pag, svibanj 2010.

Posjet Muzeju paške čipke (Galerija paške čipke), 27. lipnja 2016.

 

Paška čipkarka

%d blogeri kao ovaj: