Lajoš Škrapić: Petar Nimčev (+)

Petar Nimčev (+)

Poznal sam te, jur dičaric mali,

s tuvarušem sestri si „dvoril“.

U stranjskom smo susidi postali,

čar do sad dobar susid si bil.

Ljubil si me kot mlađega brata,

skupa s tobom smo ostarnuli.

Vik’ su ti bila otprta vrata,

nigdar se nismo mi skosnuli.

Čudakrat si mi isklepal kosu,

a novu, nedavno, zadnji put.

Sad te, dide u cimitor nosu,

na počivak, na poslidnji put.

Kot i srce, tukal ti je klepac

kad si mi tupu kosu oštril,

počistil si nam dvor, Petar tetac:

„kosač“ je sad tebe pokosil.

Pilil drivo, kalal trupce majki,

iskopal jarak za vodovod.

Pred manom je naš razgovor majski;

za misec dan – Bože – tvoj sprovod.

Da b’ te primil va nebi tvoj patron,

med svojimi ki je prvi bil,

da bi te otpeljal uz vječni tron

i dostojno misto b’ ti dilil.

Lajoš Škrapić, Obračun, Budimpešta, 1996, 94-95.

tovaruš